PAYIS D’ MOÛSE
PAYS DE MEUSE
![](https://i0.wp.com/www.beljike.be/wp-content/uploads/2019/04/Dinantcitadèle2.jpg?w=1080&ssl=1)
li Payis d' Moûse (le Pays de Meuse) (Dinant (citadèle - citadelle)
Joseph HOUZIAUX, in: VA, Ch. & P., 202/1950
Mi vî Dinant
I
Mi vi Dinant, vos dispièrtoz
Au fond di m’ keûr bin dès sovenances!
Quand dj’ vins rènè o chér Forbot,*
Dji sins s’ rèwiyi tote mi-èfance.
One bone moman pormine pa l’ mwin
Dins lès ritchèsses di vos botikes,
Po l’ rabiyi, si p’tit gamin,
Ou bin s’ papa li mine au cirke.
C’ èst todi fièsse quand nos ruvenans
Rivèy Dinant !
II
Mi vî Dinant, dji veu voltî
Vos wôtès rotches èt leûs dintèles ;
Li grande èglîje èt s’ bwagne clotchî
Qui s’ mèsure avou l’ citadèle ;
Dizos vosse pont, todi galiârd,
Moûse qui s’ kitape ou qui somadje ;
Èt co lauvau li fiér Bayârd
Qui monte li gârde dlns lès Rivadjes.
Tot nos chone bia quand nos ruvenans
Rivèy Dinant !
III
Mi vî Dînant, li nwar guignon
A porsî tote vosse vikêriye
Dispôy li djoû qu’ pa l’ Bourguignon
Totes vos maujons ont stî rostîyes.
V’s-avoz conu lès-assazins ;
Il ont rodji leûs bayonètes
Do song di vos pôves inocints.
Èt c’ èst po ça qui tènawète
I faît si trisse quand nos ruvenans
Rivèy Dinant !
IV
Mi vî Dinant, dji veu voltî
Li vayante soce di vos copéres,
Piyeûs d’ coûtches, bateûs d’ keûve, fins-ovrîs.
Gn-a-t-i dès pus adrwèts su I’ têre ?
Èt quand dj’ vin rèner o Forbot,
Dj’ aî bon do choûtè à l’ Crakerîye
Dès fauves, lès tchansons èt lès spots,
Lès Iwagnes mèssadjes èt lès minterîyes.
I faît si guêy quand nos ruvenans
Rivèy Dinant !
Po Arthur Patinet
À l’ sovenance di m’ vî mon.nonke, Emile Houziaux, Forbotî (= habitant du Faubourg)
* li Forbot: le Faubourg